Ibyo wamenya kuri Rtd Captain Uwayezu Jean Fidele Perezida wa Rayon Sports n’abo bafatanyije

Uwayezu Jean Fidele yatowe n’abanyamuryango bari bahagarariwe n’abayobozi ba Fanclub 46 zari zitabiriye inteko rusange y’uyu munsi. Uwayezu Jean Fidele yatorewe kuba Perezida w’uyu muryango ufite ikipe y’ikigugu ya Rayon Sports akaba azamara imyaka ine ayoboye iyi kipe.
Uwayezu Jean Fidele ni muntu ki?

Rtd Captain Uwayezu Jean Fidele, ni umugabo wubatse ufite imyaka 54 akaba yaravukiye mu karere ka Nyanza, magingo aya ni umushoramari wikorera ku giti cye muri kompanyi ishinzwe umutekano. Uyu mugabo afite impamyabumenyi y’icyiciro cya kabiri cya Kaminuza mu mategeko. Kugeza mu 2005 yari umukozi wa Leta mu rwego rw’Ubutabera, kuva mu 2005 yari mu nzego ziri hejuru mu bigo byigenga [Atatangaje] aho yari General Manager cyangwa Secretary General kuva mu 2010 yatangiye kwikorera.

Ubuzima bwe muri ruhago uyu muyobozi yatangarije itangazamakuru ko yakuze awukunda ndetse yamenye ubwenge akunda Rayon Sports, n’ubwo atagaragaye mu buyobozi ariko yari mu bagize umuryango. Mu gihe Rayon Sports yari mu bibazo uyu mugabo yatangaje ko yatekereje kure akareba icyo yakorera Rayon Sports nk’umusanzu we mu kubaka iyi kipe.

"Ni ikipe kuva kera itanga ibyishimo ku bantu bakunda "Football". Ubu rero tuzicara tuganire, turebe ibyihutirwa, ariko icya ngombwa ni ukureba uko twakongera kubaka Rayon Sports, kuyiha imbaraga." -Uwayezu Jean Fidele perezida
Uyu muyobozi yavuze ko iyi kipe iyi ntego yabo nk’ubuyobozi ari ugukorera mu mucyo, bagasobanurira abafana ibyo bakorera ikipe yabo ikipe ikongera igatwara ibikombe mu Rwanda no hanze nk’uko yahoze.

Komite yatowe irimo Perezida, ni Uwayezu Jean Fidele watsinze ku majwi 39, Kayisire Jacques nyiri Dream Team Football Academy yatowe nka Visi Perezida wa mbere ku majwi 33, Ngoga Roge Aimable yatowe nka Visi Perezida wa kabiri wa Rayon Sports watowe ku majwi 47, Ndahiro Olivier watorewe kuba umubitisi wa Rayon Sports dore ko yari yiyamamaje wenyine. Komite ngenzuzi izaba igizwe na: Uwamariya Joseline (Perezida), Munana Bonaventure (Visi perezida) na Havugiyaremye Ignace (umwanditsi).

Kayisire Jacques nyiri Dream Team Football Academy wahawe akazi muri Ministeri ya siporo

Komite nkemurampaka ya Rayon Sports igizwe na: Rukundo Patrick (perezida), Kamali Mohammad (visi perezida) na Rugamba Salbatore (Umwanditsi).

Perezida Uwayezu Jean Fidele yatangaje ko ikipe atagiye kuyiyobora nkugiye gushoramo imari nkuko byagendaga ahubwo iki gihe ari ugushyira hamwe imbaraga z’abafana bose ba Rayon Sports. Abajijwe kubashobora kubavangira (Ishyamba) yavuze ko amateka yarangiye atatorewe guhangana n’abantu, ashimangira gukora kinyamwuga kugirango intego bafite zizagerweho.