Sobanukirwa bimwe mu biranga itorero rifite ububyutse

1. Ijambo ry’Imana rizarushaho guhabwa umwanya kandi rigire imbaraga mu bantu b’Imana.

Iyo umuntu agereranyije ubunararibonye bwe n’ububasha bw’Ijambo ry’Imana arushaho kugwa mu rujijo, bikamukoresha amakosa akomeye mu ruhande rw’iby’Umwuka kuko iby’Imana ntibisobanurwa uko umuntu yishakiye, ahubwo bisobanurwa n’Umwuka.

Ntibivuze ko iby’umuntu n’imbamutima ze bita agaciro mu gihe cy’ububyutse ariko kandi bizemera kugengwa no kugendera mu kuri kw’Ijambo ry’Imana. Itorero ryavuga ko rifite ububyutse cyangwa se abantu runaka ariko ntiryite ku bnyanditswe byera ryaba riri hanze y’umurongo.

2 . Umwuka wo gukora ibyaha uragabanuka ahubwo abantu bakihatira kwihana no guca bugufi imbere y’Imana.

Ukwera kw’Imana kutwibutsa kamere yacu y’icyaha kukaduhatira kwihana. Yesaya 6:1-5, 2 Abakorinto 7:10,11.

Ububyutse buzana ubuntu bwinshi bw’Imana bigafatanyiriza hamwe gufasha abantu kureka ibyaha. Bidufasha kureka inzira zose mbi zacu z’ibyaha tugakurikira inzira yo kwera. Yesaya 35:18

Iyo hari ibijya gusa n’ububyutse, ibyaha birushaho kwiyongera kandi abantu bari mu nzu y’Imana.

3. Mu gihe cy’ububyutse ubugingo bwa benshi bwari bwarazimiye barabyuka.

4. Ububyutse butuma abantu barushaho gukunda gusenga.

Kimwe nuko amasengesho abanziriza ububyutse, ariko kandi akomeza kubushyigikira. Niba turi mu bihe byiza Imana iri kumwe natwe, ntitwashobora kwirengagiza gusenga. Abantu baba bumva bahatwa gukomeza kuzamura umubano wabo n’Imana kandi bakabikora mu masengesho. Umunezero wo kubana n’Imana uduhindukira ipfundo ry’ubuzima bwacu.

5. Ivugabutumwa riraguka.

Mu mateka y’ivugabutumwa, ubugingo bwa benshi burokorwa mu gihe cy’ububyutse kurusha ibindi bihe byose. Umwuka wera aba ari gukora n’imbaraga nyinshi. Ntabwo itorero ryavuga ko rifite ububyutse ntacyo riri gukora ngo rizane abandi kuri Kristo.

6. Urukundo rw’Imana

Urukundo ni ikintu gikomeye kuko Bibiliya iruvugaho ibintu bihambaye. Umuntu urufite ruramukoresha, ruramuyobora ndetse ngo niho amategeko yose y’Imana asohorera. Itorero rifite ububyutse nyabwo nta gucirirana ibico bibamo, nta bice, abantu biyumvanamo kuko buri wese aba yumva akunze mwene Se.

Hari n’ibindi byinshi nawe watekereza, ariko nubwo twavuze mu itorero, nawe wareba mu mutima wawe niba ibi bikurangwaho, ukamenya niba ufite ububyutse muri wowe.

Imana igushoboze muri byose.